Entrevista-homenaxe
“A xente xa non baila tanto e queda máis mirando para as bandas”
O de Vilariño recibiu unha homenaxe por parte dos membros de A Regionalista
- Víctor Cacho 23/9/2009
Dende o primeiro intre en que sentou con ela, Gervasio Salgueiro Estévez soubo que a amaba. Pasou tardes enteiras escoitándoa e quixo aprender a acariñala, pois axiña comprendeu que a música o envolvera nun agasallo para toda a vida. Pertenceu a un gran número de Bandas Municipais, algunhas das cales dirixiu, e ata fundou outra no ano 41, a Banda Artística de Vilariño. Pasaron xa 87 primaveras dende que Cerdeira o veu nacer e hai tan só unhas semanas, os membros da asociación A Regionalista decidiron editar un libro sobre a súa figura e renderlle unha merecida homenaxe. Familiares, amigos e veciños compartiron a tarde con el e co seu fliscorno.
-Tivo que ser moi emotivo…
-Estivo moi ben e causoume moita alegría. Regaláronme unha batuta e subín ao escenario ao final para dirixir a última peza: o himno galego. Tamén me recibiu o alcalde e puxeron unha placa co meu nome no palco de Vilariño. A verdade é que non o esperaba.
-¿Cando comezou a súa paixón pola música?
-Gustoume dende sempre. Arrimábame aos músicos cando o meu pai convidaba a comer a membros da banda que viña tocar nas festas. Eu quedaba quietiño escoitándoos…
-¿Vén de familia?
-Non. Pode ser que o meu avó, pero o resto nunca tivo relación coa música.
-¿Como se fixo co fliscorno?
-Era dun home que morrera na Guerra Civil, e merqueillo á súa familia por unhas trescentas pesetas.
-¿Lembra o seu primeiro concerto?
-Si, foi en Rumille [Padrón] e chovera moito. Regaláronme o meu primeiro traxe e, ao rematar o concerto, déronme sete pesetas. Logo, despois da misa, fomos xantar na romaría e eu non sabía que cada membro da banda tiña que levar a súa propia comida. Os meus compañeiros entón xuntaron algo para darmo a min. [ri]
-Tivo moitos mestres pero vostede tamén deu moitas clases…
-E non lle cobrei nunca nada a ninguén…
-¿Mantén o contacto cos seus alumnos?
-Con algún si, pero crúzome con moitos e é como se non me coñeceran…
-¿As bandas actuais diferéncianse moito das de antes?
-Agora a xente xa non baila tanto e queda máis mirando para elas. Hoxe levan pouco aprecio e só se avisan para misas ou romarías porque para o baile contan coas orquestras.
-¿Segue tocando?
-Si, estou na Banda Municipal da Estrada e imos tocar a moitas festas e romarías.
-¿Cales son as pezas que máis lle gustan?
-Gústanme todas, dende boleros ata pasodobres, pero as zarzuelas son das miñas favoritas.
